Lider ambientalista di Paramo di Santa Isabel, Carlos Aldairo Arena Salinas, a ser asesina pa varios homber cu arma di candela cu a tira riba dje varios biaha den un finca na nort di Tolima, autoridadnan a confirma.
E homber di 44 aña tabata campesino y guia turistico, tabata un di e promotor di e Ruta di Condor, un proyecto ambiental di ecoturismo cu ta facilita e observacion di e especie aki den peliger di extinsion y cu ta e parha nacional di Colombia. Pero tambe a resalta e cultura, custumbernan y tradicion di e pueblo cafetero y impulso di e turismo comunitario.
Arena Salinas tabata conoci como ‘Cejas’, e prome version di su morto ta señala un pelea cu tabatin cu un bisiña pa cortamento iregular di palo, algo cu e lider ambientalista a denuncia cu autoridadnan ambiental di e departamento.
Ainda no ta sigur e motibo di su asesinato, cual autoridadnan a bisa a tuma luga ora cu el a ser ataca pa dos homber arma cu a yega na finca El Africa, ubica na nort di Tolima. Nan a tira contra dje di manera indiscrimina te ocasiona su morto.
E fayecimento di Carlos Aldairo Arenas ta suma pa un lista largo di defensor di medio ambiente cu a muri asesina na Colombia den ultimo dos aña. Di acuerdo cu e ONG Ingles Global Witness, na Colombia a muri 24 lider ambiental aña pasa, di e 164 cu a muri pa causa di activismo ambiental rond di mundo.
Aunke a cifra a disminui den comparacion cu añanan anterior, na 2016 a asesina 37 defensor medio ambiental. Colombia ta ubica como e di tres pais di mundo mas peligroso pa e bida di esunnan cu ta lucha pa e medio ambiente. Brasil y Filipina ta lider di e lista.
