E hefe di Mision Verificacion di Nacionnan Uni na Colombia, Carlos Ruiz Massieu, a condena ‘e hechonan grave cu a sosode na Cauca, cu ta suma pa e situacion preocupante di e departamento’.
“E mision ta solidarisa cu e comunidad Nasa, su autoridadnan y e guardia indigena. E garantianan di siguridad pa comunidadnan ta esencial pa consolida e paz” Ruiz a agrega na Twitter.
Entre tanto, MAPP/OEA a pidi pa autoridadnan coordina pa garantisa e siguridad di e comunidadnan di Cauca, unda ta continua e operacion di disidente cu no a tene nan mes na e acuerdo di paz firma cu Gobierno na november di 2016, como tambe ELN y gruponan di narcotraficante.
“E mision ta haci un yamada urgente pa e instituto competente, pa coordina cu autoridadnan indigena e recursonan necesario cu lo garantisa e siguridad di su comunidad y lidernan”, MAPP/OEA a detaya den un comunicado.
E fayecidonan di e masacre, cu a sosode na comunidad di Tacueyó, ta e autoridad neehwe’sx Cristina Bautista, como tambe guardia indigena Asdruval Cayapu, Eliodoro Inscué, José Gerardo Soto y James Wilfredo Soto, di varios bario di e comunidad di Cauca.
Di su parti, e defensor di Pueblo, Carlos Negret, a manifesta su preocupacion pa e situacion na Cauca y a haci un yamado pa ‘respeta e bida’ den e region.
Ainda e informacion di e zona unda e hecho a produci ta confuso, pero e Fuerza Armada a indica cu e grupo indigena a ser ataca pa disidente di Farc.
