E 15 miembro di e Conseho di Siguridad di ONU, na final di un bishita na Colombia, a bisa cu e asesinato di lidernan social y ex-guerrillero di FARC ta un ‘preocupacion comparti’ y ta e desafio principal pa e implementacion di acuerdo di paz den e pais, diasabra pasa a sigura.
E jornada ultimo di trabou di e representante di ONU, cu a yega na Colombia diahuebs pasa, a tuma luga ayera na e municipio di Caldono, na departamento di Cauca, esun mas afecta pa e conflicto arma.
Na e zona ey, cu pa decada a biba algun di e enfrentamento mas crudo entre e forsa publico y FARC, awe ta converti den un partido politico. E embahadornan a scucha e reclamo di e lidernan social y e ex-combatiente tocante e ola di violencia nan contra.
“Nos ta comparti e preocupacion pa e asesinatonan. Esey ta algo cu nos a hiba como un elemento pa considera”, embahador Peruano Gustavo Meza-Cuadra, presidente di e Conseho di Siguridad di ONU, a bisa den un conferencia di prensa na Popayan capital di Cauca.
Temor pa e aumento di sucesonan sangriento a crece den e pais despues cu e Defensoria di Pueblo a informa cu 462 lider social a ser asesina desde dia 1 di januari 2016 te 28 di februari di e aña aki.
E senador di partido FARC, Jorge Torres Victoria, conoci den su tempo di guerrillero cu e alias di ‘Pablo Catatumbo’, a adverti cu awe e Cauca ta e departamento unda mas ex-combatiente a muri desde cu e acuerdo di paz a ser firma na november di 2016.
