(EFE) – Violencia a aumenta na Colombia na aña 2022, aña den cual a verifica por lo menos 92 masacre y e asesinato di 116 defensor di derechonan humano, segun loke Oficina di Alto Comisionado di Nacionnan Uni pa Derechonan Humano a señala den su rapport anual di e pais.
E representante di e oficina aki na Colombia, Juliette De Rivero, den un conferencia di prensa a señala cu den e 92 masacre verifica te awor a wordo asesina 321 persona.
Tambe e cifranan di desplasamento forsa y aislamento a aumenta den comparacion cu aña anterior, debi cu na 2022 tabatin 82.862 persona desplasa (19% di nan ta mucha) y 102.392 a wordo aisla, mientras cu na 2021 tabata 73.974 esun desplasa y 65.685 a sufri di aislamento.
Na 2022 tambe a registra un “aumento significativo” di homicidio di integrantenan di hunta di Accion Comunal, particularmente na Arauca, Bolivar y Putumayo.
Den total di homicidio di defensornan na 2022, 45% ta coresponde di miembronan di hunta di Accion Comunal, loke ta nifica cu di 13 caso na 2021 a pasa na 52 na 2022.
Di otro banda, e rapport ta cuestiona “violencia sexual y di genero, cu ta wordo utilisa como instrumento di guera,” asina como e reclutamento infantil.
Oficina a haya informacion cu gruponan arma no estatal ta involucra den e traslado di hende muhe na teritorionan di departamentonan di Choco y Nariño, cu e riesgo posibel di trata di persona cu fin di explotacion sexual, incluyendo muchanan muhe.
Den e linea aki, nan a menciona e necesidad di “implementa recomendacionnan di rapport final di Comision di Berdad, cu a wordo presenta na juni 2022,” specialmente den e capitulo etnico.
E rapport ta enfatisa e politica pa e cual e presidente Gustavo Petro ta haci impulso. Pa loke ta trata “paz total” cu esaki ta persigui y di tur medida cu a wordo adopta cu e obhetivo ey teniendo na cuenta cu ONU ta resalta “e responsabilidad di Estado como garante di derechonan humano y di protege e poblacion.”
