Presidente di Colombia, Ivan Duque, diasabra pasa a adverti Ehercito di Liberacion Nacional (ELN) cu no lo tin dialogo cu gobierno si e guerrilla ta continua “riba caminda di violencia”.
“Mientras nan (ELN) ta persisti riba caminda di violencia, nos lo enfrenta nan cu tur peso di ley, pasobra nos no ta acepta crimen como mecanismo di presion riba sociedad Colombiano,” Duque a indica.
Den e contexto aki, el a bisa cu si ELN kier pa di parti di estado scucha nan, anto na prome lugar, mester libera “tur e secuestradonan” y, ademas, pone fin “na tur acto criminal”. “Aki no ta acepta papia mientras ta asalta pueblo Colombiano. Y nan tin esey bon cla,” el a sigura.
Ademas, e mandatario Colombiano a califica di “cobarde” e ultimo accion di e organisacion guerrillero contra instalacion militar. Na su huicio, ELN “no a manifesta nunca di tin e boluntad di paz” y ta dedica na “spanta ciudadano”.
Duque a dicidi di cancela e mesa di negociacion cu gobierno tabatin planea pa organisa na Habana cu ELN na januari pasa, despues di un atentado na e scol di Cadete na Santander, cu a laga 23 polis asesina. E conversacion a cuminsa na 2017 pa gobierno anterior di Juan Manuel Santos.
Di otro banda, Duque a rechasa e atentado terorista cu ELN a haci na Boyaca den cual tres militar a keda herida pa e explosion di un autobom y cu el a califica como un acto di cobardia di e grupo arma aki, cu cada biaha ta duna menos muestra di un boluntad di paz.
