(NTN24) – A bira conoci e prome imagennan di e traslado di Nicolas Petro, yiu di presidente Colombiano, Gustavo Petro, kende a ser captura diasabra mainta den marco di un investigacion pa delito di labamento di activo y enrikecemento ilicito.
Durante e captura, tambe a aresta su ex-pareha, Daysuris Vasquez Castro, kende mester responde pa e delitonan di activo y violacion di dato personal.
Den un grabacion comparti riba rednan social, por mira esnan captura mientras ta traslada nan for di Barranquilla pa Bogota, unda nan ta bay presenta dilanti e Husgado 16 di Control di Garantia, cu a dispone e detencion di e pareha.
Den e audiciencia, Fiscalia di Colombia ta bay solicita e legalisacion di e procedementonan adelanta den e proceso, manera captura, inval y confiscamento di material probatorio, y ta bay pidi pa Nicolas Petro y Day Vasquez keda deteni cu medida di prevencion den un centro penitenciario.
Mester menciona cu maart ultimo, ex-esposa di Nicolas Petro a acus’e di a ricibi cantidadnan miyonario di placa di parti di un narcotraficante pa e campaña presidencial di Gustavo Petro na 2022. Den un entrevista cu revista Semana, Daysuris Vasquez a sigura cu Samuel Santander Lopez Sierra, alias e “Hombre Marlboro”, ken tabata extradita durante 20 aña na Merca pa narcotrafico y conspiracion, a entrega 600 miyon peso den varios pago. Den e mesun entrevista, e muhe a aclaria cu e placa nunca a yega e campaña y tur cos a ser haci tras di lomba di Gustavo Petro.
Tocante e captura di su yiu, Gustavo Petro a bisa: “Como presidente di e Republica mi ta sigura cu e Fiscalia lo tin tur garantia di mi banda pa procede segun ley. Mi yiu mi ta desea suerte y forsa. Pa e sucesonan aki forma su caracter y e por reflexiona riba su propio erornan,” el a agrega.
