Diaranson pasa, Ministerio di Salud di Colombia a presenta un proyecto di resolucion pa legalisa e interupcion boluntario di embaraso, den cumplimento cu e orden di Tribunal Constitucional.
Den e documento, e Ministerio a señala cu e proyecto ta busca garantisa cu ‘lo sigura e condicion di calidad, siguridad y salubridad di e servicio aki’.
“Pa e Tribunal Constitucional, Ministerio di Salud y Proteccion Social ta competente pa dicta e medidanan cu lo sigura e disponibilidad suficiente y efectivo di e servicio aki”, e documento ta señala.
E Ministerio a declara cu ‘a solicita pa e Tribunal Constitucional extende na 60 dia e plaso pa e expedicion di regulacion, cu e fin di studia y contesta tur e comentarionan di e ciudadanonan riba asunto aki y haci notificacion cu por considera necesario”.
Di su banda, Comision Episcopal di Bida, cu Monseñor Juan Vicente Cordoba como lider, a expresa su desacuerdo absoluto cu e proyecto.
“Esaki tambe ta pretende di restringi e derecho di obhecion di consciencia di profesionalnan y institucionnan cu nan obhetivo y principionan ta prefera e conservacion di ambos bida prome cu e morto di e indefenso” el a sigura.
Sinembargo, e documento di e ministerio ta afirma cu ‘e profesionalnan di medicina por dicidi si ta practica e interupcion di e embaraso of no pa motibo di consciencia, solamente si ta garantisa e prestacion di e servicio aki den condicion di calidad y di siguridad pa e salud y bida di e persona embarasa cu ta solicita esey, sin importa e carga adicional y sin exigi actuacion cu lo nifica obstaculisa e acceso pa servicio di salud pidi p’e, y cu esey, desconoce su derecho constitucional y fundamental di bida, salud sexual di reproduccion, integridad personal y dignidad humano”.
