(infobae) – Despues cu diahuebs ultimo a aproba e reforma tributario den Congreso di e Repiblica y e documentonan di Senado y Congreso a drenta den fase di conciliacion, minister di Hacienda di Colombia, Jose Antonio Ocampo a sigura cu parti di e responsabilidad di e desaceleracion economico cu e pais ta sufri ta bin di e panico cu comerciantenan ta sembrando.
Pa e motibo aki el a pidi nan sinceridad dilanti di opinion publico. Ademas, a bolbe rechasa un supuesto intencion di entrega su retiro.
E comentarionan a sucede ayera mainta durante un entrevista cu Noticias Caracol. Den e extenso combersacion e minister a contesta pregunta, por ehemplo, el a retiera cu e reforma tin intencion di recauda 20 biyon pesos cada aña, ademas di 20 biyon adicional cu lo colecta cu medidanan contra evasion fiscal. E strategianan aki, segun Ocampo, ta inclui castigo contra esnan cu ta sconde activo di mas di mil miyon pesos, ta keda sin paga mas di 100 miyon den impuesto, of ta carga costo na hende of negoshi cu no ta coincidi cu e servicio di e empresa.
El a recorda tambe cu e reforma no ta dedica na e deficit fiscal, pasobra pa esey a aproba recursonan den e presupuesto general. Ademas, contestando tocante e tributacion di iglesianan, cu ta drenta den conciliacion pasobra Congreso a aproba pero Senado no, Ocampo mester a haci un reserva: loke ta cay aden no ta e donacionnan of actividadnan economico cu ta bay pa e culto, sino esnan cu ta propiedad di e titular di e culto y ta beneficia su persona solamente.
Finalmente, Ocampo a descarta cu e tin intencion di hala un banda despues di aprobacion di e reforma tributario aki. “Mi no ta compronde pakico ta inventa rumornan cu mi ta retirando. Tur hende tabata bisa cu mi ta bay despues di e reforma tributario. Mi t’aki y aki mi ta keda”, e funcionario a conclui.
