E denuncianan riba e morto di varios mucha menor di edad den un bombardeo di Ehercito Colombiano contra un campamento di disidencia di antiguo guerrilla FARC a pone e Gobierno di Ivan Duque un biaha mas den controversia.
Desde prome oranan di dia 10 di maart ultimo a cuminsa circula informacion den medio di comunicacion Colombiano y internacional, e denuncianan di parti di organisacionnan social y famianan cu a keda anonimo.
Aunke gobierno no a confirma e morto di e muchanan aki den un atake y fuentenan di e denuncia ta sigui anonimo, e indignacion popular a yega pa via di declaracionnan cu minister di Defensa Diego Molano a haci pa cu esaki.
E minister recien nombra aki a laga cla y precies den su comentarionan cu Estado Colombiano ta dispuesto pa usa e forsa contra muchanan menor di edad, aunke esey ta bay den contra di derecho internacional humanitario.
“Mi tin absolutamente claro di loke disidencia di FARC ta haci y loke nan a haci ta prepara mashinnan di guera cu ta atenta contra sociedad Colombiano”, Molano a bisa despues cu a wordo interoga riba e posibilidad cu por tabatin menornan di edad den e reciente bombardeo di aviacion Colombiano.
Un declaracionnan den cual e minister a hustifica “uso ilegitimo di forsa” contra muchanan menor di edad victima di e reclutamento forsa pa gruponan ilegal ora nan a wordo compara cu “mashinnan di guera”.
Dia 2 di maart ultimo Forsa Aereo di Ehercito Nacional a bombardeo un base di un grupo arma cerca di municipio Calamar, na departamento di Guaviare.
E operacion militar a conclui cu e morto di 12 persona, manera Ehercito a anuncia entre e cual tabatin muchanan menor di edad. E principal obhetivo di e atake tabata Miguel Botache, conoci como “Gentil Duarte”, ex-integrante di e guerrilla desaparecido FARC, grupo rebelde cu na 2016 a firma un acuerdo di paz cu Gobierno nacional y a bisa cu lo laga e armanan pa drenta den politica Colombiano.
