Minister di Defensa di Colombia a pidi pordon ayera diabierna pa violacionnan y abuso cometi pa polisnan comprometi den e morto di un homber cu a ricibi varios descarga electrico cu un arma taser, loke a causa un ola di protestanan cu a laga 11 morto y centenares di persona herido.
E manifestacionnan a cuminsa diaranson despues cu Javier Ordoñez, di 45 aña, a muri na un clinica despues cu a wordo someti bao forsa pa dos polis cu un taser, aunke e homber varios biaha a pidi ‘por fabor, no mas’ mientras e tabata ricibi descarga di coriente, un hecho cu a keda graba den un video publica riba rednan social.
“Polis Nacional ta pidi pordon pa cualkier violacion di ley of desconocemento di reglamento cu e miembronan di institucion por a comete”, e minister di Defensa, Carlos Holmes Trujillo a bisa.
E protestanan a concentra na capital Bogota, Soacha y otro cu menos intensidad na Medellin y Cali, segun autoridadnan, a reporta mas di 400 herido entre civil y polis, e destruccion di un decena di stacion di polis y kimamento di autonan di servicio publico.
Trujillo a sigura cu e dos polis implica den e morto di Ordoñez, cu a wordo separa di nan funcion lo retira di institucion, nan ta enfrenta cargo di abuso di autoridad y homicidio.
Trujillo a anuncia cu otro cinco polis a wordo suspendi di nan funcion mientras ta investiga pa caso Ordoñez.
Shete persona entre 17 pa 27 aña a muri ora nan a ricibi tiro di arma di candela na Bogota durante e protestanan di diaranson ultimo, segun Alcaldia Mayor, mientras cu Gobierno Nacional a reporta e morto di otro tres persona e mesun anochi ey na Soacha.
Otro muhe a muri diahuebs anochi ultimo na Bogota ora un auto di servicio publico cu a wordo horta pa manifestantenan durante e protestanan, polis a informa.
