Colombia mester reestablece cuanto antes e fumigacion aereo cu herbicida glifosato pa reduci e cultivo di blachi di coca, produccion di cocaina, laga sin financiamento e gruponan arma ilegal y disminui e masacrenan y asesinato di lidernan social, minister di Defensa a bisa.
E pais sur Americano, considera como e prome productor mundial di cocaina, na 2015 a suspende e fumigacion aereo cu glifosato di cultivonan di blachi di coca, pa via di un recomendacion di Organisacion Mundial di Salud cu ta considera e herbicida ey como causante di cancer y dañino pa medio ambiente.
E decision en cuestion – adopta memey di un negociacion di paz cu e desmobilisacion di FARC, cu a inclui un capitulo riba droga – na 2017 a provoca un aumento di e plantacionnan di blachi di coca pa 171.000 hectar, e mayor nivel desde aña 2000, segun medicion di Oficina di Nacionnan Uni Contra Droga y Delito (UNODC).
“Colombia mester fumiga, reduci di manera lihe e cultivonan ilicito, pasobra di e manera ey nos ta caba cu e gasolin cu ta termina como recurso pa esunnan cu ta comete masacre y ta asesina lidernan social”, minister di Defensa, Carlos Holmes Trujillo a bisa.
Colombia, cu ta enfrenta un constante presion di Merca pa combati narcotrafico, na 2019 a termina cu 154.000 hectar di blachi di coca y un potencial produccion di cocaina di 1.137 ton metrico, di acuerdo cu UNODC.
Minister Holmes Trujillo a recorda cu e fumigacion tabata exitoso y a permiti pa e pais por reduci na 48.000 hectar e plantacion di blachi di coca na 2013.
“No tin duda. Colombia mester reestablece e fumigacion aereo cu glifosato pa algun rason di seguridad nacional y logicamente tin cu reestablece cu tur seguridad na materia di salud y medio ambiente”, Trujillo a afirma.
