(ElTiempo) — Merca a anuncia ayera cu lo haci donacion di US$ 2,5 miyon pa yuda Colombia den maneho di e crisis cu e entrada diario di miles di Venezolano ta causando na e pais.

E ayudo, cu lo ser suministra pa e Agencia Mericano pa Desaroyo Internacional (Usaid) lo ta destina na proporciona asistencia alimentario y di salud di emergencia na Venezolanonan den situacion vulnerabel y na e comunidadnan Colombiano cu ta tuma nan.

“E contesta negativo di e regimen pa no permiti cu comunidad internacional por brinda di manera directo asistencia humanitario dentro di nan frontera, no ta haci nada otro cu causa e exodo masivo aki”, Nikki Haley, embahador di Estadonan Uni na Nacionnan Uni, a declara. El a agrega cu su pais ta mantene su compromiso di traha cu Colombia.

“E fluho di cien miles di Venezolano a pone na prueba e servicionan medico y social di e comunidadnan na frontera Colombiano y di otro partinan di henter e Hemisferio Occidental. Lamentablemente, e crisis na Venezuela aki, cu actualmente ta plama den resto di e region, ta producto di accion humano: e ta resultado di e constante mal maneho politico y e corupcion di e regimen di Maduro,” Mark Green, encargado di Usaid na departamento di Estado, a comenta.

Segun Green, ta trata di un colaboracion inicial cu Colombia, Organisacion Pan Americano di salud y e programa mundial di alimento di Nacionnan Uni, cu lo por crece den futuro.

Green a bisa tambe cu Merca lo sigui busca forma di asisti e pueblo Venezolano mientras Maduro ta sigui nenga libertadnan fundamental y acceso na necesidadnan humanitario basico na su pueblo.

E medida a ser aplaudi pa e representantenan di congreso Ileana Ross-Lehtinen y Eliot Engel a traves di un comunicado den cual nan a pidi pa expande e esfuersonan pa henter e continente.

“Nos mester haci hopi mas. Nos ta pidi nos aliadonan na Sur America pa duna ayudo semehante y pa nan habri porta di nan pais pa tanto Venezolano den situacion di desesperacion. Segun e politiconan, comunidad internacional a tarda pa mustra su liderazgo pa atende e crisis di e Venezolanonan, tanto dentro di e pais como pafo.

E idea di e ayudo pa Colombia a surgi despues di e bishita di ex secretario di Estado Rex Tillerson na Colombia luna pasa, unda el a compromete pa busca fondo pa asisti e pais den maneho di e crisis.