E cantante Venezolano Miguel “Nacho” Mendoza a aclara den La Tarde di NTN24 e noticia encuanto e megaconcierto cu lo tuma luga na frontera entre Colombia y Venezuela pa recauda fondo y respalda e entrada di e ayudo humanitario na e pais ey. Nacho a afirma cu “mester ta e comienso di un transicion,” sin embargo, el a destaca cu a divulga un lista cu no ta completamente cierto.
El a aclara cu no tur hende a confirma y no kier specula encuanto e artistanan cu ta bay t’ey.” A pesar di esey el a bisa cu tin hopi cu kier yega.
El a afirma cu Carlos Vives ta confirma y ora e Colombiano haci su anuncio riba rednan social e lo anuncia e siguiente artista, y asina manera un cadena cada uno lo bisa ken lo ta e siguiente cu ta join. El obhetivo ta recauda 100 miyon dollar pa e Venezolanonan.
E entrevista tambe a sirbi pa Nacho laga bon cla cu “e presidente legitimo di Venezuela ta Juan Guaido,” como tambe pa mustra su speransa pa reconstruccion di e pais.
Durante un combersacion live via Instagram diabierna pasa, Juan Guaido y presidente Ivan Duque a elabora tambe riba e megaconcierto, cu lo tuma luga diabierna venidero, riba autopista internacional cerca di Cucuta.
Mientras tanto, ministro Jorge Rodriguez di Informacion di Venezuela a anuncia cu e regimen tambe ta bay tene un concierto na frontera cu Colombia. Bao di e titulo “Manos fuera de Venezuela” Rodriguez a bisa cu tabatin asina hopi artista cu kier participa cu a dicidi di haci e concierto riba dos dia, diabierna 22 y diasabra 23 di februari. E no por a menciona artista ainda.
