Autoridadnan di migracion di Colombia a saca 300 Venezolano cu for di tres aña pasa ta bibando den condicionnan sanitario intolerabel na Cucuta.
E migrantenan ta procedente di estado Yaracuy y tabata dedica nan mes na coba den desperdicio pa recicla carton, plastic, glas y cualkier obheto cu por sirbi pa gana placa. Ademas nan tabata biba den condicion deplorabel na canto di e canal Bogota y no tabata conta cu servicionan basico, manera wc, coriente, ni awa, segun e corant La Opinion.
Autoridadnan a detaya cu na e luga tabatin 120 mucha y por lo menos 10 muhe embarasa, mientras nan a revela cu 36 persona, di e casi 300 cu ta biba ey, a bolbe di manera boluntario pa Venezuela.
Sandra Roa, Subsecretario di Gobierno, a informa cu algun di e ciudadanonan desaloha di e luga a keda entrega na Migracion Colombia pa nan deportacion, mientras cu Comandante di Polis di Cucuta, Jose Luis Palomino, a bisa cu no lo permiti mas invasion di tereno na Cucuta di parti di inmigrante stranhero.
Den otro noticia, a posterga e entrega di bono di e Programa Mundial di Alimento (PMA) na centenares di famia Venezolano y persona den situacion di vulnerabilidad na Cucuta, di manera indefini despues cu siman pasa e suministro di ayudo a termina den desordo.
E entrega di bono ta e prome gran respuesta di comunidad internacional na e estado delicado di alimentacion di 90% di e cerca di 35.000 Venezolano cu ta crusa diariamente frontera cu Colombia en busca di oportunidad.
