(Infobae) – Medellin, e capital di Antioquia, ta un di e 50 ciudad pa bishita na 2023, segun e revista Mericano ‘Time.’ Pero no semper tabata asina, actualmente algun turistanan ta mantene e percepcion cu ta un di e ciudadnan mas peligroso na mundo.

E acusacion aki tabatin un responsabel unico, Pablo Escobar. Den añanan 80 y 90, e lider di e cartel di Medellin a declara un guera contra Estado, convertiendo e capital Antioqueño den e ring di e lucha entre narcotrafico y autoridad; conflicto den cual durante varios aña Gobierno nacional a fracasa den su obhetivo di disminui e alcance cu e caponan di droga tabatin na e pais.

Estado mester a duna un golpi final (cu ayudo di mas hende) pa keda cu e victoria, lo cual a sucede dia 2 di december 1993, ora e criminal mas busca di e pais y enemigo publico di Merca a muri den e dak di un cas di e bario Los Olivos di e capital Antioqueño.

E morto di Pablo Escobar no tabata e final di narcotrafico, cu durante añanan largo a papia di dje, sinembargo, tabata un alivio pa e sociedad Colombiano cu tabata drumi cu e miedo di uni na e lista di mas di 6.000 persona cu a muri pa via di e atentadonan ordena pa e capo.

A pasa 30 aña for di dia cu e narco a muri, Medellin a cambia completamente su cara, a stop di ta e ciudad di Pablo Escobar, awor ta papia di Comuna 13 (un luga ehempel di reinsercion social), Parke Berrio, Plaza Otero, Pueblito Paisa, El Poblado y otro espacionan mas pa bishita y disfruta di ‘La Ciudad de la Eterna Primavera,’ sinembargo, e sombra di e narco ta keda presente.

Na 2022, Medellin a ricibi mas di 1.400.000 turista, e mayoria di nan for di exterior di e cual un gran parti a yega cu e curiosidad di conoce e secretonan y historianan di Escobar. Esaki a permiti pa potencia “Narcoturismo,” lo cual no ta nifica recore e ciudad pa consumi substancianan, sino bishita e luganan cu a marca e historia y caida di Escobar.

Aparte di e criminal cu a causa teror na henter e pais, Pablo Escobar tabatin pensamentonan socialista, su familiarnan y trahadonan ta describi’e como un hende cu tabata disfruta di duna na esnan den mas necesidad, mas cu e idea di adkiri luhonan.

Pa autoridadnan, esaki tabata un strategia di e capo, cu tabata odia pa un gran parti di e pais, pero den varios punto di Medellin tabata un heroe, y su afan di ta un “Robin Hood moderno” tabata un fachada pa tin e masanan na su fabor.

“Ni un hende por papia malo di e homber ey akinan,” un hoben cu a prefera di keda anonimo a bisa, el a afirma cu e ta compronde cu un gran parti di e casnan cu tin den bario a ser regala pa Escobar, pero e no ta haya e logica di hustifica cu ta existi altarnan y muralnan den homenahe na e lider di cartel di Medellin.

Tambe el a sigura cu Medellin ta basta diferente na e momentonan aki y manera e, tambe tin mas hobennan cu no kier pa e ciudad sigui tene e referencia di e luga unda Pablo Escobar a sembra teror, sino algo totalmente diferente.