Ni e circunstancianan di pandemia a logra detene e biahe di protesta social cu a cuminsa manifesta un aña pasa, cu e marcha di 21 di november di 2019, den cual organisacionnan social y politico a mobilisa contra e masacrenan y asesinato di lidernan social, un problema cu a bira pio durante 2020, segun loke Instituto di Studio pa Desaroyo y Paz (Indepaz) a documenta.
E manifestacionnan tin e obhetivo cu Gobierno lo negocia un cantidad di peticionnan, den cual e tema di renta basico pa ciudadanonan den condicion di vulnerabilidad pa via di e pandemia ta un di nan y e garantianan den materia di bio-siguridad pa institucionnan educativo publico habri bek.
Ta varios e jornada di protesta cu a cuminsa desde ayera 19 y lo tuma luga te 25 di november. Esun di ayera tabata pa conmemora Welga Civil Nacional di un aña pasa. Na e momento ey e manifestacionnan tabata pacifico, esey tabata e acuerdo cu e cual Comite di Welga y Districto di Bogota a yega, aunke e mobilisacion ciudadano lo extende na distinto departamento di e pais.
“E districto y esun cu ta convoca un Welga Nacional y otro mobilisacion cu lo tuma luga e siman aki na Bogota, a acorda cu organisacionnan social lo marcha di manera pacifico y cumpliendo cu tur e protocol di bio-siguridad, asina mes lo tin delegado na Puesto di Mando Unifica, y cu Polis lo cumpli cu identifica nan miembronan, entre otro punto pa garantisa e derecho di protesta y respet pa derechonan humano”, Secretaria di Gobierno di Bogota, Luis Ernesto Gomez a sigura.
Entre e acuerdonan cu tambe a wordo haci ta e obligacion di autoridadnan como di Polis pa duna informacion permanente di luga y estado di e detenidonan cu por yega na comision di verificacion, Defensoria di Pueblo y Procuradoria.
