(EFE) – Gobierno di Merca a anuncia diahuebs ultimo cu lo destina dies miyon dollar pa apoya e reactivacion economico di Colombia y pa apoya “e poblacion vulnerabel” cu a wordo afecta pa pandemia di covid-19.
Embahador di Merca na Bogota, Philip Goldberg, a sigura cu e obhetivo di e apoyo aki, proporciona a traves di Agencia di Merca pa Desaroyo Internacional (Usaid) ta apoya e “reactivacion economico na Colombia pa aumenta entrada di e poblacion vulnerabel cu a wordo haya un impacto di pandemia covid-19”.
Igualmente nan ta pretende fortalece “e empresanan chikito y mediano pa cu nan lo por crea empleo y ta miho prepara pa otro impacto futuro”.
“Nos ta orguyoso di apoya Colombia pa aborda e impacto urgente y di largo plaso ocasiona pa pandemia”, e diplomatico a expresa.
E placa lo wordo destina pa aliansa “ReactivAccion”, cu tin impulso di Usaid y Programa di Nacionnan Uni pa Desaroyo (PNUD).
“Mi ta mira como un gesto hopi importante e apoyo aki di Usaid y di PNUD”, e presidente Colombiano Ivan Duque a afirma durante e lansamento di e programa den un acto na Cas di Nariño, sede di Ehecutivo.
E idea di e programa “ReactivAccion” ta apoya e recuperacion social y economico di Colombia den proximo dos aña a traves di e generacion di empleo di mediano y largo plaso y cu e fortalecemento di empresanan chikito y mediano.
“E contribucion y aporte aki lo ta pa cu e diseño di e politica publico ta permiti nos, den mey di contratiempo, no renuncia na ningun obhetivo di Agenda 2030 di Nacionnan Uni”, Duque a agrega.
Entre e gruponan beneficia di e proyecto aki ta e trahadonan informal, muhenan victima di conflicto of di violencia di genero, hobennan desemplea, comunidadnan indigena y migrantenan.
