![Spanish matador Jose Tomas performs a pass on a bull during a bullfight in Lima](https://www.bondia.com/wp-content/uploads/2024/07/Colombia-Ley-cu-ta-prohibi-di-corida-di-toro-na-e-pais-a-drenta-na-vigor_result-696x522.jpg)
(AP) – Ayera 22 di juli a drenta na vigor e ley 219, conoci como #NoMasOle, aproba na Camara di Representante na mei ultimo, cu un resultado contundente di 93 voto na fabor cu 2 den contra.
E ley aki ta representa un victoria historico di casi un decada di movementonan animalista Colombiano den e lucha na fabor di e respet pa bida di animalnan y specialmente, contra e practica violento aki di herencia Spaño cu a extende pa decadanan na e pais.
Esmeralda Hernandez, ken ta esun cu a haci impulso di e ley #NoMasOle, a splica na mei cu e prohibicion di corida di toro na Colombia no por ser aplica inmediatamente, sino cu ta implica e creacion di un Comite Interinstitucional.
E senador di Pacto Historico a bisa cu ta contempla un transicion di tres aña pa atende e famianan cu ta biba di e sector taurino y cu ta busca pa cambia nan fuente di ingreso pa comercio of turismo.
E ley #NoMasOle tambe ta inclui e yamado na proceso di transformacion di plasa di toro Colombiano pa espacionan cultural y ta abarca un prohibicion gradual di otro tipo di entretenimento cruel cu animalnan.
Colombia tabata un di e cinco pais di Latino America cu tabata permiti corida di toro, hunto cu Venezuela, Peru, Mexico y Ecuador. E dos ultimo aki ta prohibi practica taurino parcialmente den algun estado y ciudad. Na otro manera Argentina, Chile y Panama, ta prohibi.
“Sin bida no tin humanidad, awe dialuna plasa Santamaria di Colombia ta bisa no na toreo,” presidente Gustavo Petro a skirbi riba su red social “X.”
E prohibicion a bin for di un bandera politico di Petro desde cu e tabata alcalde di Bogota na 2012, tempo cu tabata referi na e ‘fiesta brava’ como un acto di maltrato animal y a suspende corida di toro na La Santamaria. Coridanan a continua den e capital, di acuerdo cu ordennan hudicial, pero a stop di organisa nan na 2020.
Na december 2023, un veredicto hudicial a duna orden pa reanuda e coridanan back, pero e temporada nobo no a ser anuncia ainda.
Den e pais, tin 12 plasa di toro permanente cu un capacidad entre 3.000 y 10.000 persona na ciudadnan manera Bogota, Cali, Manizales y Medellin y na otronan mas chikito como Duitama of Pamplona.