(NTN24) – Ex-presidente di Colombia Ivan Duque a lansa un duro comentario ayera diamars contra Nicolas Maduro debi na acusacionnan cu a ricibi di parti di e hefe di e regimen Venezolano.
Duque a pronuncia su mes despues cu Maduro a señal’e sin pruebanan cu e ta tras di un supuesto atentado contra e recien libera Alex Saab.
“E imbecil dictador di Venezuela ta lansa acusacionnan sin rason ni sentido di atentado contra esun cu ta laba su placa, Alex Saab,” Duque a afirma.
Tambe Duque a indica cu e captura di Saab tabata un exito di colaboracion cu varios pais y cu e pruebanan den su contra ta contundente.
“E delincuente ey a ser captura pa Merca y e pruebanan den su contra ta contundente. Cu nan a liber’e como un intercambio di prisionero, ta un realidad pero e pruebanan di Saab y su relacion cu e narco-famia dictatorial di Venezuela ta berdad,” el a bisa.
Ademas, el a cuestiona e mandatario Venezolano tocante e pagonan na Ivan Mordisco pa atentadonan na Cucuta.
“E captura di Alex Saab tabata un exito di colaboracion cu varios pais y esey semper tabata e obhetivo. Miho, Maduro splica e pagonan na Ivan Mordisco pa atentadonan na Cucuta,” el a agrega.
E acusacionnan di Maduro a tuma luga memey di un entrevista den cual a sigura cu Duque a manda ordena mata Saab na su cas na Caracas, prome cu el a ser aresta y extradita pa Merca.
“Dos dia prome cu nan kier a matel’e. Esaki nunca a bira conoci. Dos dia antes un grupo di delincuentenan contrata pa Ivan Duque di Colombia a purba mata Alex Saab na su cas, na Caracas. El a scapa milagrosamente,” Maduro a bisa.
Saab a ser aresta na Cabo Verde a 2020 y a ser extradita pa Merca na 2021 despues cu a ser acusa di labamento di placa y otro delitonan.
Dia 20 di december ultimo Saab ken tabata cera acusa di ta testaferro di Maduro y di laba miyones dollar cu e benta di cuminda na sectornan popular a ser libera a cambio di varios preso politico, entre nan seis sindicalista acusa di terorismo.
