Un tribunal Colombiano a duna orden pa ehecutivo di Ivan Duque suspende e actividadnan di un brigada di ehercito Mericano, cu na juni a yega na e pais pa apoya e lucha contra narcotrafico y un operacion anti droga den Caribe cu ta apunta pa gobierno Venezolano.
E magistrado a ordena Duque pa ‘suspende e efecto huridico di autorisacion di cualkier actividad di e brigada militar na teritorio nacional’, segun e fayo a contempla cu ta coresponde pa un recurso di proteccion interponi pa un grupo di congresistanan opositor.
Mester stop e operacion mientras e Senado ta debati si ta autorisa of no e actividadnan y presencia di tropa stranhero na teritorio Colombiano, manera e Constitucion ta establece.
Ademas ta dispone cu e presidente lo entrega pa Camara Alta ‘tur informacion’ riba e entrada, yegada y permanencia di mey centenar di unidad special di e contingente Asistencia di Fuerza di Seguridad. (SFAB na Ingles).
No ta conoci e tipo di actividadnan cu SFAB a haci desde su yegada na juni, aunke gobierno a sigura cu nan ta eherce un rol di asesoramiento y apoyo.
Minister di Defensa, Carlos Holmes Trujillo, a anuncia cu e gobierno lo impugna. “Cooperacion Internacional ta fundamental pa fortalece e lucha contra e narcotrafico”, el a bisa den un voice note cu a manda pa periodistanan.
E oposicion di e mandatario Colombiano na Congreso a rechasa e yegada di e tropa Mericano desde cu gobiernonan di Duque y Trump a haci e anuncio, na fin di mei.
E congresista a considera ‘un violacion di soberania’ y funcionnan di Senado, como tambe un causa pa un conflicto belico cu Venezuela, cu cual Colombia ta comparti 2.200 kilometer di frontera.
