Den un insolito hecho digno di un novela di Gabriel Garcia Marquez, e prome politico condena pa compra di voto, Aída Merlano, ex-senador di Partido Conservador, a huy di e seguridad cu tabata acompañ’e na Bogota mientras e tabata di permiso pa asisti na un consulta di dentista.
E ex-congresista, sentencia pa Corte Supremo di Husticia pa cumpli un castigo di 15 aña di prison pa a organisa un sistema sofistica di compra y benta di voto cu el a opera den e ultimo eleccion legislativo di 2018 , a huy di su guardianan usando un cabuya pa sali di e bentana di e consultorio y a huy riba un motorcycle, cu tabata ward’e. E conductor, segun testigo di e sucedido, tabatin paña bisti di Rappi, e plataforma di entrega na domicilio mas usa na Colombia.
E huida di Merlano a keda graba riba e camaranan di seguridad di e lugar, situa na norte di Bogota, unda el a yega den un auto di Inpec – entidad di prison di Colombia – y escolta pa dos hende muhe.
E imagennan ta mustra con banda di 3or di atardi ta tira un cabuya cora di un bentana y un momento despues un muhe ta baha na e cabuya golpeando su curpa fuertemente contra suelo. Dilanti e personanan cu tabata pasa den e area cu a keda sorprendi y cu kier a yud’e, e muhe a lanta rapidamente y a subi riba e motorcycle cu tabata warda.
Pa e momento di su huida spectacular, Merlano mester a cuminsa caba cu su proceso di colaboracion cu Fiscalia, pero su cita a keda posterga pa e permiso cu nan a dun’e pa bay dentista. Director di Inpec. William Ruiz, a declara cu lo percura pa captura e ex-congresista atrobe.
