(Infobae) – Den un operacion militar desplega diahuebs den un zona rural di municipio di Chitagá a muri e hefe guerrillero conoci como Emiliano, segundo lider di e Frente Pabón di Ehercito di Liberacion Nacional (ELN), cu ta opera den e departamento Norte de Santander, cu tin frontera cu Venezuela. Den e accion a muri tambe por lo menos tres otro combatiente di ELN.
Ta acusa Emiliano di ta responsabel di mas di shete accion terorista contra forsa arma publico y poblacion civil den e zona, ademas di ta vincula cu actividadnan di narcotrafico, extorsion, trafico di arma, homicidio y secuestro, segun e informacion oficial. Den e operativo a detene tambe otro miembro di ELN.
Den otro enfrentamento entre ehercito y e grupo guerrillero cu a tuma luga diaranson pasa a muri cinco miembro di mesun agrupacion, mientras cu dos a resulta herida, na un parti rural di municipio di Valdivia, departamento di Antioquia.
Den e caso aki, a detene tambe cuatro guerrillero, entre nan e persona conoci bao su nomber di guerrillero Paula, un di e hefenan di ELN den e region ey.
E dialogo di paz cu mester a continua na Quito, Ecuador, entre gobierno y ELN ta pasando den un di su momentonan mas dificil, despues cu e guerrilla a inicia un serie di atentado inmediatamente despues cu e alto al fuego acorda a vence dia 9 di januari pasa. Manera anticipa, ehercito Colombiano ta respondiendo fuerte riba e atakenan. Tambe, como consecuencia di e atakenan aki, presidente Juan Manuel Santos a yama su hefe di e ekipo negociado di gobierno, Gustavo Bell, na Bogota pa consulta. Mientras tanto, dia 22 di januari ultimo e partidonan a reinicia contacto pa cuminsa e di cinco ciclo di combersacion na e capital Ecuatoriano.
