(EFE) – Presidente di Colombia, Gustavo Petro, ayera diahuebs a desacredita e encuestanan reciente cu ta indica un porcentahe halto di impopularidad di su Gobierno, sigurando cu “un hende ta gaña den encuestanan” y cu e ta den e situacion di gana eleccion presidencial si esey lo tuma luga na e momentonan aki.
“Nan ta bisa bo cu gobierno ta impopular. Nan ta grita den stadionnan cu carchinan caro pa drenta. Hasta nan ta kita e futbol pa pueblo. Pero wak si eleccion tabata mañan, nos lo bolbe gana,” Petro a skirbi riba su red social X y a publica cifranan di Centro Nacional di Consultoria cu ta indica cu 51.7% di ciudadanonan tin un imagen positivo di su Gobierno.
Encuestanan publica recientemente ta mustra un tendencia den aumento di desaprobacion di Gobierno entre Colombianonan, pero un ultimo encuesta, contrata pa Presidencia, ta refleha un otro imagen.
Encuesta aki a ser haci for di 17 te cu 22 di november unda a entrevista 1.608 Colombiano di e cual, 51.7% tin un imagen positivo. Cifranan ta señala un mehoracion den percepcion di Gobierno ya cu for di october te cu november tabatin 1.2% di Colombianonan cu ta wak’e faborabel.
Sinembargo, e datonan aki ta contrasta cu esun publica den ultimo lunanan pa varios encuesta haci publico pa otro medionan.
E ultimo, haci pa e firma Datexco W Radio entre 8 y 10 di november ultimo mediante 700 encuesta telefonico, a revela cu un 64% di Colombianonan no ta aproba e manera con e presidente ta manehando e pais.
“Un hende ta gaña den encuestanan, pasobra e compania encuestado tambe ta contrata pa medionan di comunicacion. Nos ta den situacion di gana eleccion presidencial, tin cu traha mas y nos mester gana na 2026, tanto na congreso como presidencia, pa cu e cambio lo ta profundo, real y ireversibel na Colombia,” e mandatario a agrega.
