(infobae) – Presidente Gustavo Petro a lansa acusacionnan serio contra Nestor Gregorio Vera Fernandez, miho conoci como alias Ivan Mordisco, lider di Estado Mayor Central (EMC), un di e disidencianan principal di FARC.

Petro a afirma cu lo puntra e hefe guerrillero si ta berdad cu a plania un aliansa cu e auto-nomina Nueva Junta del Narcotrafico, un organisacion cu sede clandestino na Dubai, for di unda ta opera pa purba asesin’e cu ayudo di snipernan paga.

Presidente Petro a expresa su preocupacion pa e posible aliansa entre alias Ivan Mordisco y e organisacion criminal internacional aki. Segun e mandatario, e aliansa aki no solamente ta pone su bida den peliger, sino tambe ta representa un menasa significativo contra e seguridad y stabilidad di e pais.

E publicacion ta sucede despues cu a bira conoci cu un abogado di New York a bisa cu a duna informacion na gobiernonan di Merca y Colombia di un posible plan pa mata presidente Petrp.

Abogado Alexei Schacht a sigura na Univision cu el a informa embahada di Merca na Bogota y autoridadnan Colombiano di un posible atentado contra presidente Petro, basa riba informacion proporciona pa un cliente di dje acusa di narcotrafico. Schacht, kende tambe tabata abogado di Dairo Antonio Usuga, alias Otoniel, a agrega cu e plan tabata involucra un lider di e disidencianan di FARC, un ex-general di polis, un narcotraficante poderoso y hendenan cu a ricibi placa for di Dubai pa cumpra arma cu meta di ehecuta e atentado.

E abogado a destaca cu e implicadonan tabata purba di usa e recursonan aki “pa cumpra arma y municion, cu lo usa den un complot pa dia 20 di juli cu tabatin como meta pa mata presidente Petro.” E informacion, segun Schacht, ya ta den poder di embahada Mericano y autoridadnan Colombiano.

Petro a confirma di a ser informa di e plan door di embahada Mericano. Despues di ricibi un resumen di entrevista di Univision, Petro a comenta a traves di un mensahe riba WhatsApp na presidente di noticia di Univision, Daniel Coronell, tocante un reunion cu e tabatin algun dia prome cu dia 20 di juli cu embahador Mericano. Na e reunion aki, Petro a afirma cu e embahador a mustr’e un documento cu mapa detayando e ubicacion di sniper na Carrera 19, dirigi pa asesin’e durante un desfile militar.

‘Iván Mordisco’ a bandona na april e combersacionnan di paz cu gobierno. Petro a expresa cu e no ta kere cu Mordisco tin capacidad pa ehecuta e operacion.