(AP) — Gobierno Colombiano y e grupo guerrillero mas grandi cu ta resta na e pais Sur Americano a reanuda negociacionnan di paz ayera, kibrando un hiatus di alrededor di cuatro aña durante cual e rebeldenan a expande e teritorio den cual nan ta opera.
Bisiña Venezuela, cual su gobierno a reanuda relacion diplomatico cu Colombia apenas algun luna atras, a ricibi e representantenan di Ehercito di Liberacion Nacional (ELN) y gobierno di Presidente Gustavo Petro. E negociacionnan na Caracas ta yega mas di un luna despues cu e rebeldenan y gobierno a anuncia e reanudacion di negociacionnan.
E delegadonan den un declaracion conhunto a declara cu nan a reuni pa reanuda dialogo politico “cu completo boluntad politico y etico, manera exigi pa pueblo di teritorionan rural y urbano cu ta sufri di violencia y exclusion, y otro sectornan di sociedad.” Nan a agrega cu nan ta dispuesto pa “construi paz basa riba un democracia cu husticia.”
ELN a wordo funda den añanan 1960 pa studiante, sindicalista y pastoornan inspira pa revolucion Cubano. Ta kere cu e grupo tin alrededor di 4mil miembro na Colombia y tambe ta presente na Venezuela, unda ta maneha minanan di oro ilegal y rutanan di traficacion di droga.
E organisacion a bira e guerrilla di mas grandi cu ta resta na Colombia despues cu un acuerdo di paz na 2016 a disolve e Forsanan Arma Revolucionario di Colombia, FARC. Desde cu a firma e acuerdo historico, ELN a aumenta su actividadnan den teritorionan anteriormente controla pa FARC.
E grupo ta conoci pa secuestro y atake riba infrastructura di azeta, y ta lista como un organisacion terorista pa Merca y Union Europeo.
Diplomaticonan di Venezuela, Cuba y Noruega ta bay asisti e negociacionnan, mientras representantenan di Chile y Spaña ta bay observa esaki. Negociacionnan anterior, algun bayendo back na añanan 1990, a fracasa. Petro – e prome presidente iskierdista di Colombia y ex-rebelde – ta reanudando e negociacionnan como un esfuerso mas amplio pa paz den cual su administracion ta acercando gruponan arma, gang di droga y disidentenan di FARC. Esaki ta un reversion significante den strategia; su predecesor, presidente Ivan Duque a suspende negociacionnan cu ELN despues cu e rebeldenan a nenga di stop di ataca obhetivonan militar.
Lider di ELN, Israel Ramirez Pineda, a bisa den un declaracion cu e grupo den e esfuerso aki di negociacion tin meta pa produci “cambionan fundamental” manera ta exigi pa pueblo Colombiano durante demostracionnan masivo na 2021 y den encuesta e aña aki door di eligi Petro, lagando atras e tradicion di gobiernonan conservador y modera.
“Colombianonan no por mira otro cu enemigo, e trabao cu nos tin ta reconciliacion”, Ramirez Pineda a bisa. “Nos ta spera cu delegacion di gobierno ta bay tin un interlocutor den mesun sentido.”
E delegacion representando gobierno di Colombia ta encabesa pa Otty Patiño, co-fundador di e grupo di guerrilla awo extinto, M-19, di cual Petro tabata miembro durante su hubentud.
Alto Comisionado pa Paz na Colombia, Danilo Rueda a bisa cu e stapnan cu a tuma ayera ta honra e bida di esnan cu a wordo asesina, desapareci, tortura of secuestra pa motibo di e violencia na e pais.
