Colombia: Gobierno ta sigura cu tin cifranan di homicidio mas abao den ultimo 10 aña

(EFE) – Minister di Defensa Colombiano, Ivan Velasquez diaranson ultimo a sigura cu Colombia tin e cifranan di homicidio mas abao den e ultimo 10 aña, rechasando cu e pais ta bibando “su pio crisis di inseguridad,” aunke a alerta di un aumento di hortamento na persona, residencia y di brommernan.

“Na 2013 e tasa tabata di 32.6 pa cada 100.000 habitante y awe nos ta na 14.6,” e alto funcionario a indica den un conferencia di prensa den cual a haci un balans di seguridad di e prome lunanan di aña – di januari te cu juli – y den cual a indica cu “no ta berdad” cu Colombia ta enfrentando “e pio crisis di inseguridad.”

Homicidio a disminui na 20 departamento, segun datonan ofreci pa esun responsabel di e cartera di Defensa, kiermen, “62.5% di e pais.”

E minister tambe a destaca un reduccion di hortamento di negoshinan di 14%, na entidadnan financiero di 42%, pa agrega cu Gobierno ta spera “di yega na nivelnan similar na 2014 y 2015,” ya cu for di 2016 a cuminsa presenta un tendencia di aumento pa hortamento, cu a reduci na 2020 debi na pandemia.

“Pa loke ta trata hortamento, nos a tene un reduccion pa autonan y negoshinan, pero un si tin un aumento pa horta personanan, residencianan y brommernan. Sinembargo, Bogota, cu ta un di e ciudadnan cu mas ta aporta na indicador aki, a haya un disminucion di por lo menos e dos ultimo luna, danki na un politica adecua entre comando di Polis, Departamento di Polis Metropolitano y Secretaria di Seguridad Distrital,” Velasquez a manifesta.

Pa loke ta trata asesinato di lidernan social y masacrenan, Velasquez a reconoce cu ainda ta existi un number eleva di mortonan, aunke a destaca cu entre januari cu juli a reduci na un 19.3% e homicidio di lidernan social compara cu e mesun periodo di aña anterior.

Di e firmantenan di paz, minister a indica cu a mira un reduccion di 25%.

Tambe a informa di un bahada di 51% den number di mortonan di polis y militarnan pa actonan di servicio, destacando cu a notifica 50 asesinato menos cu den mesun periodo di aña anterior.

Di ultimo, Velasquez a conclui cu Forsa Militar, den aña aki, a mantene 196 combate cu gruponan arma.