(Infobae) – Ayera diabierna a cumpli 17 dia di protestanan y blokeo na henter e pais pa via di un welga nacional cu a cuminsa como un rechaso na e reforma tributario pero cu a pasa na otro reclamonan di e sociedad.
Pa via di e manifestacionnan aki a presenta problemanan di abastecemento na algun ciudadnan y zona di e pais, pa loke Gobierno a propone mesa di dialogo pa revisa e peticionnan di Comite di Welga.
Sinembargo, aunke e anuncio a wordo haci tres dia pasa, te awor e grupo no a duna un contesta na e presidente Ivan Duque, cu ken nan a haci un reunion dialuna ultimo y cu no a yega na un acuerdo. “E ekipo tecnico economico di Gobierno ta trahando intensamente, pasobra nos ta cla pa sinta y negocia. Nos mester un contesta lihe di Comite Nacional di welga”, e halto comisionado pa Paz, Miguel Ceballos a señala.
Ángel Custodio Cabreras, minister di Trabou a bisa cu nan ta cla pa realisa e conversacion cu tin mester, “nos a revisa e documento di emergencia cu nan a plantia, nos ta cla pa papia di renta basico, di salud, di educacion, di tur loke tin di haber cu produccion nacional. Gobierno nacional ta reitera su capacidad pa ricibi e mesa tecnico cu lo ta necesario y busca y duna tur solucion. E dialogo ta urgente.” Cabreras a menciona.
Ta p’esey cu diahuebs ultimo Gobierno a manda un carta na Comite di Welga Nacional, pa reitera e boluntad di inicia di manera lihe e “mesa di negociacion” cu e compania di Nacionnan Uni y Conferencia Episcopal di Colombia.
Dialuna ultimo 10 di mei, a tuma luga e prome encuentro entre Gobierno nacional, Comite di Welga Nacional y otro entidadnan, di e cual tabatin e participacion di secretario di Central Unitario di Trahadonan di Colombia (CUT) Diogenes Orjuela, y comisionado di Paz Miguel Ceballos mas lidernan di e protesta na tur e regionnan di e pais.
