(EFE) – Diadomingo ultimo, Gobierno Colombiano a exigi na disidente di FARC pa laga den libertad un polis di nomber Tomas Andres Blanco, ken a ser secuestra diabierna di siman pasa na un zona rural di municipio El Rosario, na departamento di Nariño (frontera cu Ecuador).
“Pa loke ta trata e hechonan di secuestro di e polis Tomas Blanco na Nariño. Na dje tur nos solidaridad, tur compania na su famia. Pa nan sa cu disidencia di FARC cu ta comete crimen di lesa humanidad, ta viola derecho internacional humanitario (DIH)” minister di Defensa Diego Molano a expresa.
El a agrega tambe cu “tin cu dun’e su libertad awo y respeta su bida. Forsa publico lo sigui cu operacionnan den e zona te ora cu nan liber’e, te ora cu desarma e organisacion cu no solamente ta afecta e libertad di nos polisnan sino cu ta genera violencia y temor na Nariño”.
Blanco a keda secuestra na momento cu e tabata biaha den bus na e careteranan di municipio di El Rosario. Diasabra ultimo a keda conoci un prueba di bida di e funcionario, un video den cual a sigura cu el a ser secuestra pa un grupo conoci como e columna Franco Benavides.
Alto Comisionado pa Paz, Juan Camilo Restrepo, tambe a exigi libertad di e polis y a bisa cu su secuestradonan ta conforma un “grupo narcoterorista”.
“Ta un grupo di delincuentenan cu e cual Gobierno no a sinta ni lo sinta pa tin dialogo, mucho menos utilisando e bida di ser humano pa nan proposito delictivo”, Restrepo a expresa.
Por lo menos 21 civil ta secuestra pa gruponan arma ilegal na Colombia, diamars di siman pasa e defensor di pueblo, Carlos Camargo, a bisa y a pidi nan liberacion y pa no sigui comete e delito aki.
Di acuerdo cu entidad, e number mayor di secuestro a tuma luga na Norte di Santander, frontera cu Venezuela, cu 6 caso, 5 di nan na municipio Ocaña.
