Un di e exigencianan di e lidernan di e protesta social cu a tuma luga pa e ultimo jornada di welga na Colombia ta casi cumpli: “Nos kier sinta di un manera exclusivo cu e hefe di Estado.” Esaki ta e peticion cu e comite organisado di e welga a duna, solicitud aproba pa gobierno di presidente Ivan Duque dia dos di december.
Director di Departamento Administrativo di Presidencia, Diego Molano tabata e persona encarga di anuncia e medida.”Nos a plantia na Comite Nacional cu Gobierno y presidente Duque tin e disposicion di dialogo sin ultimatum, sin presion y pa e bienestar di Colombia”, Molano a bisa pa e periodistanan.
E funcionario a agrega cu Gobierno ta ‘dispuesto y cla’ pa bay na mesa y discuti e agenda di diestres punto plantia pa e central obrero y movemento sindicalista, gremionan cu tabata lider y a convoca e protestanan cu a cuminsa dia 21 di november pasa.
Cu oportunidad di habri otro dialogo, gobierno di Duque ta busca formalisa un mesa paralelo na e Conversacion Nacional, den cual e lidernan di protesta so lo tin e palabra, pa asina por scucha e demanda di e movemento sindical y social.
Presidencia di Colombia a probecha e anuncio pa solicita pa e gremio di welga suspende e marcha cu ta convoca pa awe, dia 4 di december. Segun Molano, gobierno ta opta pa un dialogo pacifico pa sigura un ‘trankilidad’ pa comienso di epoca di Pasco.
