Na Colombia, actualmente tin habri 57 investigacion contra sacerdote di iglesia catolico pa abuso sexual di menor di edad den e Fiscalia di e nacion. E ultimo caso conoci tabata di cuater victima na Cali, pa e cual e arsobispo di e ciudad mester pidi pordon di publico.
E investigacionnan ta relaciona cu echonan cu a sosode entre 2002 y 2018, segun e cifra cu e ente acusador a entrega. Mayoria di e casonan ta concentra na e departamento di Antioquia (26,3%), e resto ta reparti na 18 region di e pais.
Mayoria (71,1%) di e investigacionnan aki ta den proceso di huicio of investigacion, pa loke ainda no a ser duna un sentencia di condena. Pero e estadisticonan ta evidencia un panorama tristo pa e victima cu ta haya e curashi pa denuncia e institucion halto di catolicismo. Pa motibo cu no tur e casonan ta caba na husticia.
Di acuerdo cu e cifranan conoci, 13,3% di proceso a keda archiva, pa via cu nan no ta haya suficiente pruebanan pa condena e sacerdote implica. 4% so di acusacion di violacion di menor di edad tabatin sentencia absoluto. Te e momentonan aki, 11,1% tabatin sentencia condenatorio.
E caso ultimo mas conoci di abuso sexual na Colombia tabata di cuater mucha, entre nan dos ruman, cu a dicidi di denuncia William de Jesus Mazo, sacerdote di e parokia Nuestra Señora de la Candelaria, di e bario Alfonso Bonilla Aragon, na e sector di districto Agua Blanca oriente di Cali, kende a abusa sexualmente di nan na 2009.
E muchanan y su famia a sufri un persecucion di e iglesia durante e decada cu a dura e proceso hudicial. Na prome luga, ta menciona cu e argumento di e iglesia semper tabata cu e muchanan a gaña pa via di e educacion malo cu su mayornan a ricibi y cu nan tabata vicioso, y aunke a ser comproba cu esey no tabata berdad, nan nunca a pidi pordon p’e declaracionnan ey.
