Por lo menos nuebe persona a keda herida den un atake cu explosivo na municipio di Segovia, den parti noord oost di Colombia, durante ciere di campaña electoral di dos aspirante di Partido Conservador. Dia 11 di maart proximo lo tin e eleccion primaria pa defini candidato presidencial pa e corientenan politico di derecha y izquierda.
Segun polis di departamento di Antioquia, unda Segovia ta situa, “a rementa den oranan di atardi un explosivo di poder limita cerca di e poli deportivo” unda e evento di ciere di campaña di Suarez y e candidato pa Camara, Horacio Gallon tabata tuma luga.
E explosion segun autoridadnan a laga nuebe herido, entre nan dos polis, pero no di gravedad. Tambe a aclara cu ni Olga Suarez ni Horacio Gallon a resulta herida.
Partido Conservador a emiti un comunicado den cual ta rechasa “cu contundencia e acto violento contra campaña di nos senador Olga y representante Horacio. Nos ta spera e pronto recuperacion di esunnan afecta. Y cu autoridadnan investiga e sucedido a fondo.”
Tabatin mas disturbio den ciere di campaña. Diabierna pasa un actividad encabesa pa ex-presidente Alvaro Uribena ciudad di Popayan a termina den disturbio di un grupo di opositor. Tambe e ekipo di candidato presidencial Gustavo Petro a denuncia cu e vehiculo den cual e tabata biaha a bira blanco di tiro na Cucuta, cerca di frontera cu Venezuela, loke despues e candidato mes a desmenti.
Tambe mas tempran den luna di februari, e partido FARC, cu a nace di e organisacion guerrillero di mesun nomber, mester a suspende nan actividadnan di campaña, pa e reaccion violento cu cual nan a topa na diferente ocasion.
Segun Registraduria Nacional di Estado Civil, 36.418.741 Colombiano tin derecho di vota den eleccion. E aspirante presidencial di Centro Democratico Ivan Duque ta esun cu mas a crece den intencion di voto den encuesta den luna di februari, y ta dilanti den e encuestanan hunto cu Gustavo Petro (Colombia Humana; izquierda), ambos cu 22% di intencion di voto. Nan dos probablemente lo bira e candidatonan pa topa den e eleccion presidencial na mei.
