E partido politico FARC, cu a surgi di e guerrilla Colombiano desarma, a pidi pordon pa e miyones di persona cu a resulta victima di e conflicto arma, cu a dura mas di 50 aña na Colombia.
Den e marco di e conmemoracion di dia Nacional di Memoria y Solidaridad cu e Victimanan di e conflicto arma, cu ta celebra dia 9 di april di cada aña, e partido ademas a garantisa cu lo cumpli cu e compromiso di reparacion cu a ser acorda den e texto di paz na La Habana.
“Nos ta e prome pa acepta e responsabilidad cu ta coresponde nos pa e erornan cu a ser cometi, y pidi pordon na e victimanan cu a padece pa motibo di nos actonan”, e agrupacion politico a señala den un comunicado.
“Den practica, nos tur como Colombiano ta responsabel y victima di e tragedia aki alabes”, FARC a expresa, cu tambe a agrega cu ta e Estado cu tin e obligacion di garantisa paz.
“Ta e mayor responsabel, door di no ta capaz di genera e condicion basico pa e convivencia ey y e establecimento di un sociedad husto”, a expresa.
Diamars pasa, na e Salon Eliptico di Capitolio Colombiano, a ricibi un dozijn di victima di e conflicto pa conmemora e fecha, cu a surgi di e Ley di Victima y Restitucion di Teranan.
