Partido FARC, forsa politico den cual e guerrilla antiguo a transforma despues di firma acuerdo di paz, oficialmente a expulsa Luciano Marín Arango, alias Iván Márquez, y Seuxis Pausias Hernández Solarte, alias Jesús Santrich, dos di su lidernan bieu, pa encabesa e grupo cu na final di augustus a anuncia e regreso na armanan y bida insurgente.
Den un comunicado cu Conseho Politico a publica, e partido a afirma cu ‘e anuncio di rearme ta desconoce nos instancianan di direccion nacional, nos principio organisado di direccion colectivo y centralismo democratico, estableci den Statuto, den Codigo di Etica y tur lineamento politico y principio di materia disciplinario, aproba den Congreso Constitutivo di e Partido Fuerza Alternativa Revolucionario di Comun, FARC’.
E decision di e partido a keda oficial un luna y mey despues cu Márquez y compania a aparece den un video graba na Venezuela, den cual nan tabata anuncia e inicio di un etapa di lucha arma nobo y creacion di un ‘guerrilla nobo’ bou e simbolo y nomber di FARC-EP.
E uzo di e nomber ey tambe ta otro punto cu e partido politico a rechasa den e comunicado, a señala cu ta un ofensa pa ‘nos prestigio, construi durante hopi aña di lucha, cu sacrificionan grandi y sanger ofrenda pa e paz di nos pueblo’.
A destaca tambe cu mayoria di ex-combatiente ta mantene firme cu e proceso y nan ta cumpli e acuerdo y su reincorporacion na bida civil.
Hunto cu Márquez y Santrich, tambe a expulsa di e partido tur e ex-lider di e guerrilla cu a aparece den e video pa anuncia su rearme.
