Ex vice-ministro di Transporte di Colombia, Gabriel Garcia Morales, cu a ocupa e puesto durante gobierno di Alvaro Uribe, a ser deteni diahuebs cu a pasa, riba acusacion di corupcion cu contrato cu e empresa constructor di Brasil Odebrecht, Fiscalia a informa. “Fiscalia tin prueba cu ta confirma cu Garcia a solicita 6.5 miyon di dollar, pa garantisa cu Odebrecht por ta un firma acredita y asina participa den licitacion di un contrato vial na Colombia”, General Nestor Humberto Martínez a bisa den rueda di prensa. E captura di Garcia ta e prome detencion na Colombia pa e caso di Odebrecht, y ta relaciona cu e asignacion cu gobierno a duna na e empresa aki na december di 2009, pa un trayecto di mas di 500 kilometer, riba ruta di sector 2 so, cu ta uni centro di Colombia cu Caribe. E proyecto a ser firma na januari di 2010, durante gobierno di Alvaro Uribe (2002-2010) y awor ta den ehecucion ainda.
Segun Fiscalia, Garcia a exclui otro competidornan, cu obhetivo di cu e Instituto Nacional di Concesiones (INCO) por a duna e contrato na Odebrecht, manera a sucede. Na final di december e funcionario Garcia a nenga den un carta publico cualkier caso di corupcion durante su periodo na ministerio di Transporte na Colombia. Awor den proximo oranan autoridadnan lo acusa su persona di delito di soborno, enrikecimento ilicito y interes ilegal na entrega di contrato. Fiscal a bisa cu Odebrecht a paga 11.1 miyon dollar en total, destina pa soborno na Colombia pa contrato publico. Fiscalia a aproba e posibilidad di pago di banda di Odebrecht na Colombia di 32 miyon peso (10.9 miyon dollar) cu a ser usa pa reparacion di daño, cu a causa na administracion publico di Colombia. E cantidad aki a ser acepta pa Odebrecht.
