(infobae) – Un di e crimennan mas conoci di siglo XXI na Latino America ta ehecucionnan extrahudicial cu a registra na Colombia durante e mandato di Alvaro Uribe Velez, den cual a gaña miles di hoben cu promesa di empleo pero a termina registra como fayecido durante enfrentamento entre Forsanan Militar y guerrilla.

E hechonan, denuncia pa un grupo di mama na municipio di Soacha y Bogota, a termina cu e hallazgo di miles di caso similar y a descubri cu miembronan di Ehercito Nacional a participa cu obhetivo di presenta resultado a cambio di beneficio.

Maske den mas di un ocasion e mandatario Colombiano e tempo ey, Alvaro Uribe Velez a sigura cu e no tabata na altura di e practica aki, mamanan di e victimanan y diferente ONG a señal’e, hunto cu minister di Defensa y ex-presidente Juan Manuel Santos, como responsable di mas di 6mil ehecucion extrahudicial cu a registra di e manera denomina popularmente como “falsos positivos”.

15 aña despues cu a registra e hechonan aki, tres organisacion y diesun victima a presenta un denuncia contra Alvaro Uribe Velez na Argentina pa su presunto participacion di e ehecucionnan extrahudicial. E acusacion a keda presenta dia 7 di november dilanti Husgado Federal 2 di Buenos Aires.

Pa motibo cu a haci e denuncia bao amparo di hurisdiccion universal, esaki ta permiti cu por investiga e ex-mandatario internacionalmente pa hechonan registra na Colombia.

Riba su cuenta di X, Alvaro Uribe Velez a responde na e acusacionnan den su contra, afirmando cu e colectivo di abogado cu a presenta e denuncia na Argentina ya a presenta acusacionnan similar den su contra na Colombia. “E Colectivo di Abogado, e mesun di e victimanan falso di Mapiripan, e mesun di infamia contra mi durante 30 aña, e mesun cu ta sconde den Derechonan Humano pa protege e violencia di teroristanan supuestamente di iskierda. E mesun ey awo ta denuncia mi na Argentina,” el a comenta.

Igualmente el a afirma cu e ta prepara pa afronta e acusacionnan contra su persona den loke el a cataloga como un accion temerario contra dje cu lo ta financia pa actornan politico. “Y mi tambe ta expresa na husticia di Argentina cu mi ta cla pa enfrenta e temeridad nobo aki di abogado den servicio di causanan politico.”