Ex-presidente Colombiano Alvaro Uribe, un di e hombernan mas investiga den e pais, a suma un proceso mas den Corte Supremo di Husticia, e biaha aki pa spionahe militar pa por lo menos 130 persona, entre nan periodista nacional y stranhero y tambe defensornan di derecho humano.
E accion di e instancia mas halto di hurisdiccion ordinario na Colombia a origina pa via di un e-mail anonimo cu Sala Especial di Instruccion a ricibi, den cual ta sigura cu Uribe, ken tabata presidente entre 2002 y 2010, supuestamente tabata e destinatario di informacion recogi di spionahe informatico di e militarnan.
Pa e rason ey, Corte Supremo a anuncia diamars ultimo e apertura di un investigacion preliminar contra e ex-presidente y senador, cu hunto cu e proceso aki tin 29 proceso pa diferente motibo den tribunal y esey ta obheto di 200 otro instancia, incluyendo e Comision di Acusacion di Camara di Representante, pa delitonan cu ta bay desde injuria te su presunto vinculo cu matansa, pero cu ningun condena.
Un investigacion publica na comienso di luna di mei pa e revista Semana y titula “Las Carpetas Secretas” ta señala cu e operacion di spionahe militar a tuma luga entre februari y december di aña pasa.
Entre e victimanan di e accionnan aki tin periodista-, defensor- di derecho humano, sindicalistanan, general y miembronan di Gobierno, entre nan Jorge Mario Eastman, cu aña pasa a ocupa e funcion di secretario general di Presidencia, y como tal un homber cerca di e hefe di Estado, Ivan Duque.
Uribe ta un di e politiconan Colombiano cu mas investigacion tin pa su actuacionnan den su carera como funcionario publico, incluso como presidente, pero di tur di nan el a scapa danki na un ekipo fuerte di abogadonan.
