(EFE) – Ex-hefe paramilitar di Autodefensas Unidas de Colombia (AUC) Salvatore Mancuso, ken a sali for di prizon La Picota ubica na Bogota diaranson ultimo, a sigura ayera diahuebs cu e no ta debe mas nada na husticia. A pesar di e procesonan pa miles di crimen cometi pa e grupo ey durante conflicto arma, el a bisa cu el a cumpli cu su castigo caba.

“Mi a sali for di prizon cu e condena cumpli,” Mancuso a sigura den un rueda di prensa na unda a insisti cu “mi no ta debe nada na Husticia Colombiano ni na otro pais di mundo.”

Mancuso a ricibi e orden di libertad y diaranson ultimo a sali for di La Picota, na unda tabata deteni for di momento cu el a yega Colombia na februari ultimo despues di su deportacion for di Merca na unda a cumpli un condena di 15 aña y 10 luna di prizon pa narcotrafico.

Sinembargo, for di dia cu el a yega Colombia, 27 di februari, su status tabata den duda, ya cu tin varios husticia, esun ordinario y esun di Husticia y Paz (crea cu acuerdo di Paz cu FARC), esun cu tabata debati ken mester a encarga cu e ex-hefe paramilitar.

Finalmente, Husticia y Paz a duna luz berde pa su liberacion despues cu Instituto Nacional Penitenciario y Carcelario (Inpec) a manda 31 carta na varios despacho hudicial pa haya sa si tabatin medida di aseguramento contra Mancuso.

Awor Mancuso a bisa cu el a “recobra su libertad back” y ta bay cuminsa un “gestion di paz” cu Gobierno di presidente Gustavo Petro a encarga pe unda ayera mes a reuni cu consehero comisionado di paz, Otty Patiño “pa por programa y organisa tur loke ta relaciona cu agenda cu mi mester desaroya na e pais.”

AUC ta e grupo cu mas homicidio atribui durante e conflicto arma Colombiano y crimen di guera pa lo cual Mancuso no a ser husga ainda, ya cu e condena cu el a paga na Merca ta pa narcotrafico.

Sinembargo, Gobierno ta considera cu “como gestor di paz” e lo por yuda pa repara algun di heridanan, y por ehemplo, yuda den e recuperacion di curpanan desaparecido pa paramilitarnan tanto na Colombia como na Venezuela.

“Mi kier bisa na victimanan di conflicto arma, di e cual mi tin responsabilidad, cu no tin ningun hustificacion pa e dolor y sufrimento grandi cu nos a causa y pa loke nos a comete,” Mancuso a señala.

Ademas, el a sigura cu no ta bay actua influencia cu vengansa of represalia, referiendo indirectamente na ex-presidente Alvaro Uribe, cu segun tabata su “aliado” y cu despues a firma su extradicion pa Merca.

Uribe ta esun cu a negocia e desmobilisacion di AUC, cual varios biaha a ser acusa pa traha den aliansa cu forsanan di Estado pa combati guerrilla.