(EFE) – Ex-alcalde di Medellin Federico Gutierrez, cu tambe ta ex-candidato presidencial di coalicion derechista Equipo por Colombia, ayera diahuebs a denuncia na Corte di Husticia e candidato iskierdista Gustavo Petro pa supuesto montahe contra dje durante eleccionnan pasa.

“Na e momentonan aki nos ta haciendo un ampliacion di denuncia na Sala di instruccion di Corte Supremo, ya cu dia 11 di mei ultimo nos a demostra di ki manera sistematico di parti di e campaña di Gustavo Petro y di su grupo criminal, tabata haci montahe pa afecta nos nomber”, Gutierrez a expresa pa periodistanan.

E ex-alcalde di Medellin a sigura cu Petro y su campaña tabatin “relacion directo cu criminalnan pa afecta nos honra y nos bon nomber”, aunke no a duna detayenan riba e pruebanan cu a presenta na e tribunal halto pa duna sosten na su denuncia.

Gutierrez a haci e denuncia husto e dia cu a leak e videonan den cual Roy Barreras senador di Partido Historico unda Petro ta lider, ta propone plannan pa desacredita rivalnan y ta papia di bishitanan cu miembronan di e coalicion a haci den prisonnan pa papia cu e grupo “extraditabel”.

E ex-candidato cu no a pasa e prome buelta a bisa cu lo vota na e di dos buelta pa e candidato independiente populista Rodolfo Hernandez, un empresario multimiyonario cu tabata alcalde di Bucaramanga entre 2016 y 2019.

Den e videonan publica pa medionan local, tambe ta papia di contacto cu presonan cu tabata warda nan extradicion pa Merca, y cu segun e revista Cambio a revela na april, e hechonan a ser cometi pa e senador eligi di Pacto Historico, Piedad Cordoba, pa “apoya e campaña” di Petro.

Fuentenan di inteligencia cita pa Reuters a señala cu e reunionnan a ser haci cu José Leonardo Muñoz Martínez, alias “Douglas”, antiguo hefe di e grupo di sicario Oficina di Envigado; Juan José Valencia, alias “Andrea” y parti di e brasa financiero di Clan del Golfo, y John Freddy Zapata, alias “Messi” cu ta forma parti di e grupo criminal aki, esun di mas grandi na e pais.

Den sentido aki, Gutierrez a bisa cu el a haci e denuncia como “un ciudadano, tata di famia” cu por a mira “kico ta e berdad di e denuncianan falso cu nan tabata haci y di con e pais a haya sa di ki manera perverso nan tabata kier troce e berdad pa nan mesun beneficio y pio ainda uniendo cu criminalnan”.