(AP) — Cabesante di e grupo rebelde mas grandi cu ainda ta resta na Colombia a bisa dialuna cu lo cumpli cu un acuerdo recien pa suspende secuestro di civilnan solamente si gobierno mantene su promesa di financia proyectonan cu lo duna e rebeldenan fuentenan di entrada alternativo.
Den un columna publica riba Pasco, comandante di Ehercito di Liberacion Nacional, Antonio Garcia a argumenta cu oficial- y periodistanan Colombiano a malinforma publico riba dia 17 di december ora nan a anuncia cu e rebeldenan a bay di acuerdo pa stop cu secuestro si extende un alto al fuego cu gobierno proximo aña.
Colombianonan ta rabia cu e secuestronan na man di guerrillanan, conoci como ELN. Garcia a bisa cu mientras cu a yega na un acuerdo asina durante un ronda recien di negociacion di paz na Ciudad de Mexico, gobierno tambe a bay di acuerdo den e negociacionnan pa crea un comite cu lo haya manera pa financia e negociacion di paz y e alto al fuego actual y determina ki sorto di actividadnan ta bay financia.
E conflicto entre gobierno y e rebeldenan iskierdista di ELN ta bay back na añanan 1960. Forsanan Arma Revolucionario di Colombia, FARC, cual tabata mas grandi, a acepta un acuerdo di paz cu gobierno na 2016, pero ELN ainda tin como 2mil pa 4mil combatiente na Colombia y e bisiña Venezuela.
Lider di ELN, Garcia a skirbi cu e financiamento publico pa e alto al fuego mester ta “vincula” na e suspension di secuestro.
“Paz no ta diseña pa un banda so gana,” el a skirbi. “Tur hende mester beneficia, sepcialmente e pais.”
Anuncio di Garcia ta marca un obstaculo pa e prome gobierno iskierdista di Colombia, cu a describi e acuerdo tentativo cu ELN pa stop cu secuestro como un stap importante na caminda pa paz.
E negociacionnan actual entre ambos banda a cuminsa na november 2022. Mientras cu nan a produci un alto al fuego di seis luna cu ta termina dia 30 di januari, tin tiki progreso den otro areanan.
Pero Garcia a adverti cu no ta bay forsa e grupo pa stop cu secuestro. “Nos no a yega na un acuerdo den e negociacionnan di paz riba detencionnan politico, hudicial of economico,” el a bisa riba X.
Ministerio di Defensa Colombiano a bisa cu e grupo tin actualmente como 38 rehen secuestra.
