E cese al fuego unilateral pa motibo di Semana Santa, cu a ser anuncia pa e guerrilla Ehercito di Liberacion Nacional (ELN), a cuminsa ayera despues cu diasabra pasa tabatin dos accion violento na dos departamento Colombiano.
Diahuebs pasa e ELN, e guerrilla principal di Colombia , a anuncia un cese unilateral di operacion ofensivo pa Semana Santa, cu a inicia ayera, diadomingo dia 14 di april y lo finalisa diadomingo dia 21 di e mesun luna pa 12or di marduga”.
“Durante e dianan aki, nos lo actua di manera defensivo, kiermen cu nos lo contesta si nos ta ataca so, y nos no lo realisa accion ofensivo”, e grupo a señala den un comunicado di e senador Ivan Cepeda, di e partido iskierdista Polo Democratico Alternativo (PDA) y un ‘facilitado’ di e dialogo di paz.
E cuminsamento di e cese al fuego tabata precedi pa un atake na e departamento di Arauca, frontera cu Venezuela y Antioquia y cu e autoridadnan a atribui pa e guerrilla aki.
Segun e Ehercito, ELN a ataca diasabra pasa e trupanan perteneciente na e Campaña Militar y Polis di Aquiles, cu tabata na e municipio di Valdivia (Antioquia), unda e soldaat Carlos Alberto Ureña Robles a muri.
Den e comunicado, e ELN a sigura cu tin un ‘ofensivo militar y paramilitar descomunal’ den su contra, a pesar di cual a sigura cu lo haci un cese al fuego den contesta pa un carta cu a ser manda e 5 di april pa varios ex- negociado di paz y politico Colombiano.
Tambe den e comunicado, e firmantenan a pidi pa e Comando Central (COCE, mando) di ELN lo declara un cese unilateral al fuego pa lo permiti continua cu e negociacion cu e Gobierno y finalisa e conflicto arma na e pais.
