Un batayon di Ehercito Colombiano na e departamento di Arauca, frontera cu Venezuela, a ser ataca cu explosivo diasabra pasa pa ELN (Ehercito di Liberacion Nacional).
E hecho a provoca herida pa tres persona y a causa hopi daño material, fuentenan oficial a informa.
“Den oranan di a tardi di awe (diasabra) a lansa explosivo den e instalacion di e canton militar di e municipio di Saravena, Arauca. Nan a cay riba e casnan di e fiscalnan unda personal no combatiente t abiba, hecho cu nos ta reprocha y condena energicamente”, e Ministerio di Defensa di Colombia a indica den un comunicado.
Testigonan a sigura cu aproximadamente seis carga explosivo a cay riba e casnan fiscal di e instalacion di e Grupo di Caballeria Mecanisa Number 18 General Gabriel Revéiz Pizarro di e Ehercito y nan a destrui e dak y bentananan.
Autoridadnan a precisa cu e explosivo ta parce di a ser lansa desde un luga cercano cu uzo di cilindro bomba. E presidente Ivan Duque a categorisa e atake nobo na Saravena como ‘un acto miserabel y canalla’ y a responsabilisa ELN pa e suceso.
“Esaki ta un acto terorista contra e instalacionnan di e heroenan di Colombia, y mi kier expresa cu nos ta rechasa contundentemente e acto di teror aki, cu a ser plania un biaha mas desde teritorio Venezolano, unda hopi di e lidernan di e organisacion ey ta, protegi pa e dictadura di Venezuela” el a sostene.
Dia 9 di maart ultimo, Duque a haci un bishita na Saravena y a sigura cu su administracion no lo descansa pa cu terorismo.
