Miguel Botache Santillán, alias ‘Gentil Duarte’, ta un disidente di FARC cu no a join e proceso di paz y ta mantene contacto cu gruponan criminal na Brasil y Mexico.
Actualmente Botache ta e narco mas busca na Colombia, pa ken autoridadnan ta ofrece un recompensa cu ta yega na 1.762.939 dollar. Ta considera cu e ta e menasa mas importante pa e situacion interno despues di e conflicto, mientras cu e disidentenan di FARC ta dedica nan mes principalmente na cultivo, fabricacion y benta di cocaina.
‘Gentil Duarte’ ta comanda e trupanan di FARC cu a bandona e proceso di paz y a establece nan mes den e zonanan unda historicamente tabata cultiva coca, controlando principalmente e region di Guaviare. Actualmente nan ta den proceso pa expande den direccion di Amazonas y e fronteranan cu Venezuela y Brasil.
Segun e corant El Tiempo ta relata, e disidencia a forma na 2016 cu 150 miembro, y awe ya ta conta cu 500 hende bao di arma y 500 persona cu ta patruya. E otro lidernan di e desertornan di paz ta Rodrigo Cadete, Iván Mordisco y Jhon 40. Hunto e disidentenan aki di FARC ta mantene negoshi cu e caponan grandi di mafia na Brasil y Mexico. Na Brasil nan tin contacto cu e cartelnan di familia do Norte y comando vermelho, cu ta maneha e mafia di Rio de Janeiro, segun El Tiempo, cu ademas ta revela cu a cambio di droga nan ta ricibi arma di gran alcance, municion y explosivo.
Anteriormente, tempo cu a declar’e ‘obhetivo di alto balor militar’, ehercito a bisa cu bao menasa Gentil Duarte tabata obliga e cunukeronan pa sembra coca, y tabata cobra 7 dollar pa cada baca. Asina el a bira un di e disidentenan mas rico.
E guerrillero, cu a drenta e grupo guerrillero cu 18 aña, ta ser recorda pa a maneha e rutanan di narcotrafico y di ta esun cu tabata mantene e secuestradonan den selva di Caquetá y Guaviare.
