Presidente Colombiano, Ivan Duque, a pidi Conseho di Siguridad di Organisacion di Nacionnan Uni (ONU) ayera na Bogota pa prolonga cu un aña mas e Mision di Verificacion di acuerdo di Paz. E ta considera cu su ‘acompañamento ta vital pa e proceso aki di re-incorporacion’ di ex-guerrillero.
“Mi a haci entrega pa e presidente di Conseho di Siguridad e carta cu ta ratifica cu nos kier compaña e Mision pa un aña mas”, Duque a manifesta den un declaracion pa periodistanan, despues di reuni cu 15 miembro di e organo aki cu ta bishita e pais.
E mandatario a splica cu Gobierno Colombiano a haci e solicitud pa motibo cu ta considera cu e trabou di e Mision di Verificacion ta vital pa e re-incorporacion di ex-guerrillero di FARC, cu a acepta e acuerdo di paz.
Gobierno Colombiano y FARC a firma na november di 2016 un acuerdo di paz despues di cuater aña di negociacion, y den dje a keda specifica cu ONU ta esun cu ta encarga di verifica e implementacion di e pacto.
E presidente di e Conseho di Siguridad di Nacionnan Uni, embahador Peruano Gustavo Meza-Cuadra, a manifesta cu nan tabatin un reunion di trabou hopi productivo cu Duque, den cual a keda informa di ‘avancenan di e proceso di implementacion di acuerdo di paz, desafionan cu ainda ta presenta’.
E delegacion lo traslada pa un di Espacio Teritorial di Capacitacion y Reincorporacion (ETCR), ora nan lo papia cu ex-guerrillero cu a completa su re-integracion pa un bida den sociedad, despues cu nan a laga arma atras.
