Presidente di Colombia, Ivan Duque, a pidi China diahuebs pasa pa reconsidera su respaldo na e gobernante Venezolano, Nicolas Maduro, ken el a calfica di “dictador”, durante un bishita na Estadonan Uni, segun informacion di agencia EFE.
Duque a solicita China “respetuosamente” pa apoya Juan Guaido, como presidente encarga di Venezuela. “Esaki ta importante pa Latino America,” Duque a añadi, cu a consideracu esaki “lo duna mas respet na e papel cu China por desempeña den un region cu a mira e dictador aki empobrece y caba cu e pais.”
Durante su segundo dia di bishita na Merca Duque a insisti den su respaldo abierto na Guaido y a haci un yamada na comunidad internacional pa mobilisa pa dia 23 di februari proximo, fecha cu a fiha pa e entrada di e ayudo humanitario na Venezuela.
Segun e mandatario Colombiano, pueblo Venezolano “ta invitando comunidad internacional pa dia 23 (februari) haci tur lo posibel pa e ayudo humanitario.”
“Mi ta kere cu comunidad internacional, e lidernan di medio, e lidernan di opinion, mas cu ta discuti loke ta bay pasa cu Maduro, ta loke mester haci pa pasa loke mester pasa y esey ta e fin di e dictadura,” el a indica.
Duque, cu a papia durante casi ora y mey tocante Colombia, e proceso di acercamento cu guerrilla di Ehercito di Liberacion Nacional (ELN), economia di su pais, a dedica varios momento di su intervencion na e tema di Venezuela y e “blokeo diplomatico” contra regimen di Maduro.
