Presidente di Colombia, Iván Duque, diahuebs pasa a anuncia cu den un operacion di ehercito a captura Norberto de Jesús Arango Loaiza, alias El Perro, señala como miembro di e grupo terorista ELN, de tabata forma parti di e structura criminal conoci como ‘Heroes di Anorí’.
Durante e inauguracion di Expo Agrofuturo 2019, na e Centro de Convenciones Plaza Mayor de Medellin, e mandatario Colombiano a afirma cu e politica di su gobierno ta ataca sin descanso e organisacionnan arma den margen di ley.
“Lunanan pasa un grupo arma ELN na Antioquia a atenta contra algun integrante di Polis Nacional y ademas a pretende sembra angustia den e region. E bandidonan ey tabata uza e nomber di ‘Héroes de Anorí’ di e guerrilla di ELN. E dia di awe, den un impecable labor, a captura Norberto de Jesús Arango Loaiza alias ‘El Perro’, un di e hefe di e structura criminal aki”, Duque a anuncia.
Tambe a agrega: ‘nos lo sigui enfrenta ELN cu tur determinacion, pasobra nos politica ta cu esun cu ta haci, ta esun cu ta paga, ta mas bibo cu nunca. Colombia ta duna di respeta, y e Forsa Militar ta na e teritorio pa garantisa siguridad di e pais’.
Varios siman pasa, e forsa arma a mata alias Guacharaco, lider di ELN investiga pa e asesinato di lidernan social.
E presidente Colombiano a sigura cu esaki tabata un importante golpi pa structura di e grupo terorista.
