(NTN24) – Director di Inteligencia Nacional di Colombia, Carlos Ramon Gonzalez a renuncia di su cargo diabierna ultimo, despues cu Fiscalia a acus’e di dirigi un plan pa soborna parlamentarionan.

Esaki ta e persona mas cercano na e mandatario cu ta cay den e scandal di corupcion cu ta alcansa gobierno den e gestion di Unidad Nacional di Gestion di Riesgo, UNGRD.

“Mi ta acepta e renuncia di Carlos Ramon… Su cargo como responsable di inteligencia civil ta incompatible cu cualkier investigacion hudicial,” presidente Gustavo Petro a skirbi riba su cuenta di X.

Fiscalia a acusa Gonzalez di duna “instruccion” pa soborna e presidentenan di e dos camara di Congreso a cambio di agilisa e tramite di varios iniciativa legislativo di gobierno. E sobornonan lo a alcansa un miyon dollar den total y a ser entrega na fin di 2023, tempo cu Gonzalez tabata fungi como director di Departamento Administrativo di Presidencia di e Republica (Dapre).

Diahuebs ultimo, despues di haya sa di e acusacion di Fiscalia, presidente Petro a pidi pa “haci e investigacion profundo contra e corupcion den tur caso, caiga quien caiga.”

Gonzalez, kende tabata miembro di e guerrilla extinto M-19 hunto cu e presidente, ta defende su inocencia, pero den su carta di renuncia a admiti cu su posicion ta “insostenible politicamente.”

Di su banda, Procuraduria General – cu ta investiga disciplinariamente e empleadonan publico – a habri un investigacion riba minister di Hacienda, Ricardo Bonilla y riba ex-minister di Interior, Luis Fernando Velasco, pa su supuesto participacion den corupcion.

PG tambe a vincula na e dossier e embahador Colombiano na Argentina, Camilo Romero, y ocho congresista.

E ehecutivo ta haya su mes sacudi pa e scandal aki di corupcion, den cual dos alto directivo di e organo estatal di emergencia a confesa di a usa recursonan publico pa soborna parlamentarionan.

Olmedo Lopez y Sneyder Pinilla, ex-director y ex-subdirector di UNGRD, respectivamente, a confesa na e Fiscalia cu nan a desvia placa destina pa emergencia climatico na algun di e regionnan mas pober di Colombia.

E ex-funcionarionan lo a keda cu un parti di e recursonan y cu e resto nan a soborna parlamentarionan Ivan Name y Andres Calle, kende e tempo aya tabata presidente di Sendado y di Camara menor di Congreso, respectivamente, segun e organo acusador.

“Mi ta kere cu e dos persona aki a keda cu mas di mil miyon peso (alrededor di 250mil dollar) y cu pa debolbe tur loke a horta ta fundamental,” Petro a reacciona diabierna riba X.

Lopez y Pinilla ta enfrentando castigo di entre 8 y 33 aña di prison pa delito di concierto pa comete delito y malversacion pa apropiacion di recurso publico, entre otro. Pinilla a anticipa diahuebs cu e lo delata “hende hopi poderoso” a cambio di beneficio hudicial.

Segun e fiscal di e caso, Andrea Muñoz, nan a sigui “instruccion cu Carlos Ramon Gonzalez a duna,” kende ta considera como parti di e circulo intimo di Petro y presidente di Partido Verde prome cu su yegada na ehecutivo. Lopez y Pinilla ta bisa cu a ricibi menasa y diahuebs a asisti na nan audiencia pa cargonan usando bulletproof vest. Nan testimonio ta punta riba mas di 20 funcionario, incluyendo otro politico cercano na e presidente.