Diamars pasa, despues di un controversia hudicial y politico, e ex-lider guerrillero Seuxis Paucias Hernández Solarte, miho conoci como ‘Jesus Santrich’, a tuma posesion como congresista den camara baho di Congreso Colombiano, esey a provoca e rechaso di varios sector cu ta critica e acuerdo di paz, cu a pone fin pa e conflicto cu e guerrilla di FARC despues di 50 aña di guera.
Na oficina di e di dos vice-presidente di e Camara di Representante ta unda ‘Santrich’ a pone su firma cu ta duna acreditacion como miembro di e Comision Shete di e corporacion ey. Ta marca un di e momentonan mas espera pa e partido FARC (Forsa Alternativo di Comun) cu ta haya 10 asiento den Congreso manera a keda acorda den e proceso di paz entre e gobierno di Juan Manuel Santos y e ex-guerrilla.
‘Jesus Santrich’, cu anteriormente tabata comandante di FARC, a acepta e acuerdo di paz cu a ser negocia na La Habana, Cuba, y cu a ser firma na Bogota na 2016, ora a keda acorda e historico desmobilisacion di e guerrilla y entrada di e grupo ey den bida civil como partido politico, entre otro concesionnan di ambos banda.
Presidente Ivan Duque a mustra critico di e decision di husticia transicional y a bisa cu ‘Jesus Santrich’ ta un mafioso cu tabata negocia e envio di cargamento di cocaina. E reincidencia ta un humiyacion pa e pueblo Colombiano cu no lo por acepta’, el a bisa den pleno crisis institucional.
Mientras cu sociedad Colombiano ta concentra entre esunnan cu ta defende e pacto di e acuerdo di paz y otro cu ta sostene cu e acuerdo aki a seya e impunidad pa e responsabel maximo di e conflicto, 11 di juni ‘Jesus Santrich’ a tuma su asiento den forma reserva dilanti di e vice-presidente di e Camara di Representante, Atilano Giraldo.
