(Yahoo Noticias) – Na aña 2022 tabatin mas di 13.000 homicidio na Colombia, loke ta nifica cu mas di 35 persona a muri pa dia di manera violento. Un cifra hopi halto, cu ta e segundo cifra mas halto den ultimo nuebe aña.
Entre 1998 y 2012 a registra 331.470 homicidio, loke ta duna 23.676 victima mortal pa aña. Ta parce cu e pais a laga atras e añanan mas duro, pero cifranan no ta gaña: violencia ta keda presente den nivelnan insoportabel pa cualkier sociedad.
Den solo 24 ora esey a keda demostra, aunke pa desgracia e sucesonan aki ta keda forma parti di e dia pa dia, ta existi e miedo den poblacion cu cualkier dia por ta e ultimo di nan bida. Den esaki, cinco masacre a laga atras un saldo di por lo menos 18 persona asesina, segun Instituto di Studio pa Desaroyo y Paz (Indepaz) a confirma.
Tur e sucesonan aki tabatin un componente den comun: presencia di gruponan criminal como autornan di e hecho. E ultimo di nan tabata esun di Villanueva (departamento di Casanare), na unda varios persona desconoci a asesina tres Venezolano. Polis ta kere cu e hechonan tin relacion cu microtrafico, esaki ta trafico ilicito di cantidad chikito di droga.
Di acuerdo cu Indepaz, cu e masacrenan aki ta yega na 86 e cantidad di masacre cu a tuma luga na Colombia na 2023. Cantidadnan similar na esun di añanan anterior. Na 2022, a registra 94, cu 300 victima mortal y na 2021, 96 cu 338 victima mortal. Ni sikiera na 2020, cu pandemia di Covid-19 y aislamento, a hala rosea di violencia cu 91 masacre.
E cifranan stabiel aki ta mustra cu Colombia ta sigui keda den man di violencia maske tin esfuerso di Gobierno pa logra acuerdo cu diferente guerrilla.
