(EFE) – Delegacion di paz di Gobierno Colombiano ta confia cu mesa di dialogo ta bay fortalece den e di dos rond di palabracionnan cu guerrilla Ehercito di Liberacion Nacional (ELN), cu ta bay wordo instala awe na Mexico y cu tin como obhetivo principal logra un acuerdo pa stop e fuego bilateral.
Otro di e puntonan cu ta bay trece dilanti na Mexico ta referi na e participacion di sociedad den e construccion di paz, cu no a wordo explora y cu aunke ambos parti kier involucra hende muhe, sociedad civil y campesinonan, tin varios vision tocante con ta bay haci esaki.
“Agenda di trabou ta claramente delinea, nos ta bay termina di discuti kico ta e puntonan cu ta bay conforma e dialogonan di paz cu ELN y nos ta bay presenta e agenda aki na e pais y comunidad internacional,” senador Ivan Cepeda miembro di delegacion gubernamental a bisa minuutnan prome di biaha pa Mexico.
Cepeda, ken semper a bin como partidario di un salida negocia cu gruponan arma, a agrega cu “delegacion di gobierno ta den disposicion. Ta bay warda e delegacion di ELN na Mexico y nos ta espera cu por pone man den asunto aki.”
E delegacion gubernamental tambe a gradici e “hospitalidad” di Mexico cu hunto cu Venezuela, Chile, Noruega y Brazil ta garante di dialogonan di paz.
Nan a recorda cu e dialogonan ta sigui tene acompañamento permanente di Secretario General di Nacionnan Uni, a traves di su representante Special na Colombia y representantenan di Conferencia Episcopal di Colombia.
Pa e di dos ciclo Polis Colombiano ta bay uni na e observadonan di Forsa Militar, completando “ e pleno participacion di forsanan arma.”
