(EFE) – Cultivonan di coca a crece un 13% na Colombia y a ubica den 230.000 hectar na aña 2022, loke ta supone e mayor cifra historico pa di dos aña consecutivo, y tambe un aumento den e produccion di cocaina, segun loke Oficina di Nacionnan Uni contra Droga y Delito (Unodc) a señala den su rapport anual.
“Pa di dos aña consecutivo, cultivo di coca a alcansa un maximo den historia di Colombia,” Unodc a revela y tambe a informa cu ta trata di 26.000 hectar cultiva mas cu e 204.000 di aña 2021.
Segun e rapport, a registra un aumento di 24% di e produccion potencial di clorhidrato di cocaina, aña pasa tabata di 1.738 ton y na 2021 tabata di 1.400 ton. Pa esaki, e organisacion a bisa cu “e tendencia di aumento di produccion potencial di cocaina ta continua y como resultado di mas hectar sembra cu coca, ubica na areanan cu mayor productividad.”
Segun Unodc, e situacion cu ta genera mas preocupacion ta na departamento di Putumayo, frontera cu Peru y Ecuador, unda e cultivonan di coca a aumenta cu 77%. E situacion ta asina critico den region aki, na unda ta opera varios grupo di disidencia di antiguo FARC, cu aumento di e areanan cu sembra di coca na Colombia sin conta Putumayo tabata di 3%.
Otro dato cu e rapport a señala ta cu 65% di e cultivonan di coca ta ubica na tres departamento: Nariño, Norte di Santander y Putumayo, ademas den e 1.122 municipio di Colombia 185 di nan tin coca y cu e localidad cu mas cultivo ta Tibu, na Norte di Santander cu 22.000 hectar.
Tambe e documento ta resalta cu 49% di e cultivo ta ubica na areanan di maneho special, na Parke Nacional Natural, areanan di indigenanan, teranan di comunidadnan di hende preto y reservanan forestal.
